اقتصاد مصر | زلزال في السوق السوداء للدولار والصاغة بعد ضربة الشهادات - مباشر مصر

النهاردة كان يوم اسود في حياة السوق السودا والدهب .. طيب ليه.. هنقولك لحضرتك.. عشان بنوك مصر والأهلي  طرحوا شهادات ادخار بفايدة قياسية وغير مسبوقة وصلت لـ 27% وعشان تستوعب إزاي الشهادة دي كبيرة لو حطيت مليون جنيه لمدة سنة هتاخد 270 ألف جنيه يعني هتاحد فايدة ضخمة من غير تعب ولا مخاطرة.

طبعا ضربة البنوك في مساء الخميس كانت زي زلزال ضرب السوق الموازية للدولار وكمان في أسواق الصاغة.. تعالوا نعرف ليه.. اللي بيخلي الناس تشتري دهب في وقت الأزمات وسعره يزيد بسبب زيادة الطلب على الشراء وهو نفسه اللي بيخلي ناس تتاجر في الدولار هو الحفاظ على قيمة فلوسهم وفي نفس الوقت زيادتها، والشهادات الجديدة بتعمل ده هتديك فايدة كبير بميزة مش هتلاقيها في أي سوق وهي إنك هتكسب وتحفظ فلوسك في سوق شرعي وقانوني ومضمون ومتصان ومش معرض إنك تخسر فلوسك كلها لو اتقبض عليك  وانت بتاجر في السوق السودا للدولار أو لما الدهب ينزل أو ممكن يتسرق أو يتبدد لأي سبب.

معروف إن الاستثمار في البنوك أفضل استثمار آمن في مصر دلوقتي ودا كلام الاقتصاديين مش كلامنا.. طيب وإيه تاني.. شوف بقى لما السوق السودا توقع معنى كده إن الأسعار هترتاح والأسواق كلها هتهدي وا معناه بردوا إن الحكومة لسه عندها القدرة والمرونة على التعامل مع كل الأزمات وإدارة الأسواق.

وبعد ما البنوك طرحت الشهادات الجديدة حصل زي قلبان في الصاغة والناس بدأت توقف وتفكر بسبب الفايدة المغرية اللي فاجأت بيها البنوك المصريين، والدليل على ده إن الشهادات بقت ترند جوجل وهيكون فيه هجوم عليها لدرجة إن البنوك قررت تفتح البيع للشهادات يوم الاجازة بكرة الجمعة عن طريق بنوك الانترنت ودا بيقول إن الأيام الجاية هي أيام الشهادات القياسية وراحة البال على حساب السوق السودا والدهب والأيام هتحكم.