اقتصاد مصر | الحكومة هتصادرها ولا إيه.. مفأجاة بشأن سيارات المعاقين - مباشر مصر

في الفترة الأخيرة، الحكومة شكلت لجان وزارية من الجمارك والتضامن والصحة، عشان تفحص كويس سيارات المعاقين، وده بيجي بعد قرار رئيس مجلس الوزراء الدكتور مصطفى مدبولي بفحص سيارات المعاقين خلال آخر سنتين.

واللي حصل، إن بعد إجراء عينة عشوائية ثبت أن نحو 70 إلى 80% من المستفيدين من سيارات المعاقين، ناس عادية أسوياء، ومش من مسحقي العربيات دي.

ومن هنا، الحكومة اتكلمت عن ظاهرة اسمها تجارة الجوابات، وحذرت منها، وأكدت إن اللجان الحكومية اللي شكلتها، بترصد المخالفات اللي بتحصل في الملف ده بشكل يومي، وأكدت كمان أنها رصدت عدد كبير من سيارات المعاقين لا يستفيد منها أصحابها، وبالتالي بيكون التصرف القانوني هن، هو التحفظ على السيارة وتوقيع غرامات كبيرة على اللي راكبها لأنه غير مستحق.

طب.. هل هيتم مصادرة سيارة المعاقين للناس الغير مستحقة؟

بص يا سيدي، سيارات المعاقين مش هيتم مصادرتها إلا بحكم قضائي ناتج عن ارتكاب المالك نفسه جريمة جنائية، ومن هنا بيستوجب من المحكمة مصادرة العربية، وهي أن بيقوم المالك باستخدام العربية مثلا في تجارة المخدرات أو جرايم تانية بتستوجب مصادرة السيارات سواء معاقين أو غيرها.

وخليك عارف، إن سيارات المعاقين اللي بيتم التحفظ عليها عشان فساد في الأوراق، بتقع تحت طائلة القانون، وفي الحالة دي بتكون العقوبة هي إضافة الضريبة الجمركية وضريبة القيمة المضافة عليها، يعني بيتم التعامل معها على أنها ليست للمعاقين، والمالك الجديد بيسدد مبلغ للدولة، بعدها بيتم الإفراج عنها وتسليمها له مرة تانية.

وعشان ماتتعرضش لكده، هنقولك شوية ضوابط لقيادة سيارة المعاقين، واللي هي أن العربية بيتم استيرادها وفق ضوابط حددها القانون رقم 10 لسنة 2018 الخاص بحقوق الأشخاص ذوي الإعاقة لحيازة سيارة ذوي الهمم المعروفة بسيارة المعاقين المعفاة من الضريبة الجمركية أيا كان نوعها، وضريبة القيمة المضافة المقررة عليها كمان.

وحدد القانون ضوابط قيادة السيارة للمعاق، وهي أن يقود سيارته بنفسه وفي حالة عدم قدرته على ذلك، لابد أن يكون موجود برفقة السائق المحدد في الرخصة، ولازك يكون أحد أقاربه من الدرجة الأولى أو الثانية وفق قانون المرور.

ولو حضرتك مستحق سيارات المعاقين، وعايز تتجنب المساءلة القانونية، فلازم تقدم المستندات والأوراق اللي بتؤكد أن العربية بحوزته وبتستفيد منها، وتقدم ما يفيد بأن حضرتك من ذوي الاحتياجات الخاصة.

كمان، لازم تقدم رخصة العربية ورخصة المعاق للجان الحكومية اللي بتتولى فحص الأوراق أو المعاينة،  وده عشان تضمن أن موقفه سليم 100%، وأنك من مستحقي الدعم الحكومي المخصص للعربات دي.