نشكركم اعزائنا المتابعين لموقع مباشر مصر ونتمنى قراءة مميزة لهذا الخبر
مصر قلبت مفاتيح القوة في المنطقة ومن غير ما تضرب رصاصة واحدة.. إزاي مصر بقت راس الحربة في التجارة الدولية.. وايه اللي بيحصل في سيناء.. وليه المشاكل بتزيد على الحدود.. خليكم معانا عشان نفهم ايه اللي بيحصل بالظبط لأن مفيش حاجه بتحصل صدفة في الحروب التجارية والمنافسة الاقتصادية والصراعات على الأسواق
من حوالي 10 سنين حصلت في مصر زلازل سياسية وأمنية وانتهت على خير بتولي الرئيس السيسي واللي كانت نقطة فارقة في تاريخ مصر الحديث، وبدأ السيسي حكمه بطريقة مختلفة جدا وموزعش فلوس على الناس ولا باع لهم الوهم.. والناس استغربت لما بدأ يسابق الزمن في تنفيذ مشروعات عملاقة في البنية التحتية وفي كل المجالات طرق ومواني وشبكة لوجستيات ومدن جديدة وكهرباء وغاز وانفاق ووسائل مواصلات جديدة حياة تانية جديدة خالص قامت في قلب الصحرا في العاصمة الإدارية والعلمين والجلالة واستصلاح ملايين الافدنة.. الناس بدأت تسأل ليه الرئيس ييرمي الفلوس في الصحرا.. لغاية ماحصل الي حصل في العالم .
اللي حصل بقي أن فيه صراع اقتصادي رهيب وسريع في العالم بدأ بين أمريكا والصين وبعدين بين أمريكا وروسيا وبعدين دخلت اسرائيل على الخط ومعاها دول تانية وبقى الصراع على خطوط التجارة الدولية.. خليك معانا عشان تعرف اللي بيحصل حولينا... شفنا حكاية ممر بايدن واللي جاي منين ورائحة فين واللي كان المفروض هيبدأ من الصين وهيعدي من السعودية والإمارات والأردن ويطلع من اسرائيل على أوروبا وبعدها بدأ كلام عن خطوط تجارية تانية واستبعدوا منها مصر.. لكن على مين اومال احنا بنعمل موانئ وطرق وكهربا ومحاور ورقمنة ليه من سنين.. وفجأة مصر قالت كلمتها واستعرضت عضلاتها الاقتصادية وموقعها الجغرافي وقالت احنا اللي اخترعنا خطوط التجارة ومحدش هيتحكم فيها غيرنا ..
مصر سابت كله يتكلم وفجأة طلعت كل اللي عندها واعلنت عن شبكة موانئ ولوجستيات وطرق تربط الدول وممرات بين اسيا وافريقيا وأوربا بأقصر طرق ومعاهم اهم قناة بحرية في العالم .
ومن بين المشروعات اللي مصر وقفت بيها الكل عند حده في المنطقة هو مشروع الممر اللوجستي الجديد في سيناء لخدمة نقل الركاب والبضايع والتجمعات السكنية والصناعية والتعدينية بسيناء، وتم فيه ربط المصانع بوصلات سكك حديدية ثم التصدير عبر ميناء العريش وطابا إلى الخارج، ودا كله مرتبط مع شبكة السكك الحديدية بأنحاء الجمهورية، وكمان ضيف عليه ممر تاني جمبه للتجارة الدولية وهو ممر العريش - طابا؛ واللي بيمر بمنطقة الصناعات التقيلة في منطقة لبنى، ومصانع العريش للأسمنت، ومصانع الأسمنت الأخرى الموجودة في المنطقة، ومصانع الرخام ومنطقة الحسنة ونخل يعني لأول مرة سيناء بتكون شبكة واحدة عشان اللي جاي واللي جاي تجارة دولية من آسيا وهتمر من العراق والاردن والسعودية وتروح من سيناء بكل اللي الإمكانيات اللي فيها اللي أوروبا.. عرفتوا ايه اللي بيحصل في سينا دلوقتي ودا مش كل حاجة اللي جاي حاجة تانية خالص...
بخلاف اللي قلناه كله لسه متكلمناش عن المنطقة الاقتصادية لقناة السويس ولا عن إعادة الحياة لميناء العريش والمينا دا لوحدة حكاية لانه هو اللي هيكون راس الحربة المصرية اللي هتضرب كل الممرات البديلة واللي هيحول سينا لمحور اقتصادي عالمي... ببساطة واختصار مينا العريش هتبقى دراع مصر الطولية اووي على البحر المتوسط ونافذة عبور المواد الخام السيناوية والبضائع القادمة من دول المنطقة العربية والخليج إلى أوروبا بجانب البضايع اللي جاية من الخط التجاري العربي الجديد اللي وقعته مصر مع دول عربية ..
ليه مينا العريش بقى فرس الرهان إنه يبقي من أهم مواني العالم في الفترة الجاية.. ببساطة الموضوع كام جزء منه صدفة.. لما اتعرضت سوريا وتركيا لزلزال مدمر في فبراير الماضي و إعلان المنطقة الاقتصادية لقناة السويس التشغيل التجريبي للرصيف الجديد بعد تطويره بميناء العريش بطول 915 كم، وكان التشغيل التجريبي بالصدفة باستقبال أول سفينة يتم شحنها بمساعدات إنسانية لتركيا وسوريا، باعتبار المينا هي أقرب نقطة بحرية للدولتين ومن هنا السيسي قرر يحول المنطقة كلها لسنغافورة جديدة بتضم مينا العريش وقناة السويس والمناطق الاقتصادية وشبكة طرق وشكك حديدية وقناة سويس جديدة على البر وأنفاق في جنوب بورسعيد و تحيا مصر بالإسماعيلية ، وبقت المنطقة محور ومستقبل العالم الاقتصادي ودا يفسر لينا الصراع بين روسيا والصين وأوروبا واليابان وكوريا على الاستثمار في المنطقة الاقتصادية لقناة السويس وكل دولة عاوزة يبقى ليها قدم اقتصادي في المنطقة اللي هتغير مصير العالم وهتتحكم في تجارته.
تطوير وتوسعة مينا العريش لوحدها كلفت حوالي 4 مليار جنيه وهو مدينة اقتصادية كاملة وفيه مثلا صوامع صخمة لتخزين وتداول الاسمنت الأسود بالمينا عشان تتصدر للأسواق الخارجية، بطاقة تخزينية 75 ألف طن وبدأ بحجم تداول 250 ألف طن تصل إلى 2 مليون طن خلال 2024 بعد الانتهاء من جميع مراحل المشروع بتكلفة استثمارية 830 مليون جنيه، حيث يقع المشروع على مساحة 6 آلاف متر مربع داخل الميناء ومتوقع تحقيق إيرادات من تداول السفن في هذا المشرع ما يقرب من 28 مليون دولار...خلي بالك ودا مشروع واحد جمب مينا العريش ..
ايوا لسه معاكم في سينا ومخلصناش كلامنا لأن كل اللي اتقال حاجة بسيطة قدام الوضع على الأرض واللي هيقلب معادلات الاقتصاد والنقل في العالم ولان جمب ميناء العريش وشبكة الطرق اللي حوليها والمشروعات المساعدة اللي هتخليه اهم مينا محوري في العالم .. الدولة شغالة في واحد من أكبر وأهم مشروعات الربط على البحر الأحمر وهو ممر «العريش - طابا» اللوجستي، وهو مشروع إعادة تأهيل وتطوير وإنشاء خط سكة حديد الفردان - شرق بورسعيد - بئر العبد - العريش - طابا، بطول إجمالى 500 كيلومتر، أطلقوا عليه قناة سويس جديدة بس على قضبان والممر ده بيبدأ من ميناء العريش البحرى لغاية منفذ طابا البرى ويربط بينهما خط سكك حديد العريش - طابا، وهو امتداد لخط «الفردان - بئر العبد - العريش» مرورًا بمنطقة الصناعات الثقيلة فى وسط سيناء، ويتضمن المشروع إعادة تأهيل وتطوير خط السكة الحديد «الفردان - بئر العبد» بطول 100 كيلو متر، وكمان خط سكة الحديد من بالوظة لغاية ميناء شرق بورسعيد بطول 44 كيلو مترا، بالإضافة إلى إنشاء خط بئر العبد العريش بطول 81 كيلو، وإنشاء خط «العريش - النخل - التمد - طابا» بطول 275 كيلو مترا، وضيف على ده كله الدولة بتعمل جسور و سكة جديد بطول 20 كم لغاية ميناء شرق بورسعيد، لربط ميناء شرق بورسعيد بخطوط شبكة السكة الحديد لتعظيم نقل البضائع عن طريق النقل السككى، وربط ده كله بمينا العريش
الخلاصة الموضوع كبير جدا جدا وازاي مشروع واحد ممكن يحل أزمات مصر كلها.. رغم الظروف الطارئة والعابرة اللي البلد بتمر بيها لكن فيه معجزة بقت حقيقة على أرض سينا ومشروعات بدأت تشتغل وشبكة مواني هي الاحدث في المنطقة ودا بيدينا امل مشروع وكبير في بكرة.
شكرا لمتابعينا قراءة خبر اقتصاد مصر | مينا العريش راس الحربة.. خطة السيسي للتحكم في خطوط التجارة الدولية نجحت - مباشر مصر على موقعنا مباشر مصر ونحيطكم علما بان محتوي هذا الخبر تم كتابته بواسطة محرري بانكير ولا يعبر اطلاقا عن وجهة نظر مباشر مصر وانما تم نقله بالكامل كما هو، ويمكنك قراءة الخبر من المصدر الاساسي له من الرابط التالي بانكير مع اطيب التحيات.