نشكركم اعزائنا المتابعين لموقع مباشر مصر ونتمنى قراءة مميزة لهذا الخبر زي ما قولنا لحضراتكم قبل كده فيه تطور ملحوظ بيحصل في علاقة مصر بصندوق النقد الدولى في الأيام الأخيرة وفيه تغير مفاجئ في لغة وخطاب الصندوق عن مصر.. وبعد ما كنا بنسمع عن شروط ومحاولة املاءات.. بقينا نسمع كلام عن تفهم الصندوق لوضع مصر ودعم غير مشروط للحكومة المصرية لمساعدتها على مواجهة التضخم.. فيا ترى ايه اللي حصل خلا الأمور تنقلب رأسا على عقب ؟ وليه صندوق النقد لهجته تجاه مصر اتغيرت 180 درجة ؟ وهل يتخلى الصندوق عن شرط تعويم الجنيه ويوافق على مراجعة برنامج التمويل اللى اتفق عليه مع مصر في شهر ديسمبر السنة اللى فاتت؟ وايه دور الرئيس الروسي فلاديمير بوتين في انقاذ الجنية؟ وامتى ممكن نشوف نايج بريكس على الأرض ؟ وهل فيه اتفاقيات مبادلةة عملات محلية مصر هتوقعها الفترة الجاية؟ وايه تاثير ده على أزمة نقص العملة اللى بتعانى منها مصر؟
نظرة العالم لمصر قبل 7 أكتوبر اللى فات حاجة وبعده حاجة تانية خالص.. والمواقف المتشددة اللى كانت دول غربية كتير واخداها ضد مصر اتغيرت تماما بعد الدور المهم اللى لعبتوا القاهرة في العدوان الإسرائيلي على غزة ورفضها القاطع لسناريو تهجير اهل غزة الى سيناء.. ووقوف الرئيس السيسي بشجاعة ورفضه لكل الاغراءات والتهديدات اللى اتعرضت ليها مصر أكد على قوة ومكانة أكبر دولة في الشرق الأوسط والكل عرف ان مصر هي رمانة الميزان في المنطقة ومن غيرها ممكن المنطقة تتحول الى جحيم والحرب ممكن تمتد في كل العواصم وساعتها محدش هيكون في مأمن من نار الحرب.
وكل الرؤساء والزعماء والملوك والامراء اللى قابلوا السيسي في اخر شهرين أدركوا أهمية الوقوف الى جانب مصر تحديدا زعماء ورؤساء الدول الأوروبية اللى بتسيطر على مؤسسات التمويل الدولية وفى القلب منها صندوق النقد الدولي.
والتصريحات اللى طالعة من الصندوق بتؤكد ان المسئولين هناك عرفوا أخيرا أهمية دور مصر الإقليمي في منطقة بتشهد اضطرابات جيوسياسية من وقت للتانى وعشان كده اتغيرت لهجة الصندوق في أسابيع قليلة على وقع التحديات اللي بيشهدها الشرق الأوسط بفعل الحرب الإسرائيلية على غزة.
ومؤخرا ادلت كريستينا جورجيفيا مديرة صندوق النقد بتصريحات مهمة أكدت فيها ان الصندوق هيقدم كل وسائل الدعم لمصر.. جورجيفيا مجبتش سيرة اى شروط أو مطالب الصندوق عاوز الحكومة المصرية تنفذها ومنها طبعا ترير سعر صرف الجنيه أمام الدولار وباقي العملات الأجنبية وتسريع برنامج طروحات الشركات الحكومية وده تحول كبير في نبرة الصندوق اللي كان بيؤكد مرارا وتكرارا على ضرورة تعويم العملة وتخارج الحكومة من الاقتصاد عبر الطروحات.
مديرة صندوق النقد الدولي قالت ان الصندوق بيعمل حاليا مع الحكومة المصرية اللي بتقوم بجهد ملحوظ في ظروف صعبة لتحديد الأولويات بما فيها تقديم الدعم للسكان المحتاجين وخلق فرص تطوير للقطاع الخاص وقالت ان هيتم مواصلة العمل والجهد في الاتجاه ده.. واتكلمت عن أهمية قوة الاقتصاد المصري في تحقيق الأمان والاستقرار في المنطقة المضطربة بسبب ما يحدث في غزة ومن قبلها في ليبيا والسودان.
جورجيفيا أكدت على احترام صندوق النقد للخطوات اللي خدتها مصر وأشادت بالإصلاحات اللى قامت بيها الحكومة زي خلق بيئة أفضل للاستثمارات الخاصة ودعم القطاع الخاص بالإضافة لجهود دعم الطبقات ذات الدخل المحدود وتحسين سياسات الدعم لتكون أكثر فعالية.
وأعطى صندوق النقد الدولي الأولوية لمعركة التضخم في مصر على حساب تعويم الجنيه على غير المعتاد مع تأجيل أي كلام عن تحرير سعر الصرف اللى كان شرط أساسي من شروط الصنجوق للموافقة على مراجعة قرض ال 3 مليار دولار .
وفيه تسريب جديد حصلنا عليه هنا في بانكير.. بيقول أن صندوق النقد الدولي بيدرس مضاعفة القرض لمصر من 3 إلي 6 مليارات دولار بفايدة ضعيفة.. وكمان فيه مفاجات من العيار التقيل هتعرفوها في الفترة اللي جاية..
طب ايه حكاية انقاذ بوتين للجنيه المصري؟
بداية كن 1 يناير 2024 مصر انضمت رسميا لتحالف بريكس وده واحد من اهم التحالفات الاقتصادية في العالم وتقريبا بيسيطر على حوالى 30% من حجم التجارة العالمية والتحالف ده بتقوده دولة كبيرة زي روسيا اللى بتسعى بكل قوة الى انهاء هيمنة الدولار على التجارة العالمية من خلال استحداث عملة احتياط جديدة وكمان بتعمل اتفاقيات تبادل عملات محلية بين الدول الأعضاء في بريكس والاتفاقيات دي هتخلى اى تاعمل تجارى يتم بالعملات المحلية وهيتم التخلي عن العملة الأمريكية يعنى مثلا مصر لو هتستورد حاجة من روسيا هتدفع بالروبل ولو روسيا هتاخد مننا حاجة هتدفع بالجنيه المصري وطبعا ده هيخفف الضغط على الاحتياطي النقي من العملات الأجنبية وهيقلل الطلب على الدولار وده هيقوى موقف الجنيه وهيخليه يستعيد جزء كبير من قوته المفقودة
ومصر فى الفترة الجاية هتوقع عدد من اتفاقيات مبادلة العملات المحلية مع دول مهمة زي الصين والهند وتركيا ودول تانية كتير وده هيكون ليه مردود ايجابي على ازمة نقص الدولار كمان هيوفر اختيارات أكبر لمصر وفرص مكنتش موجودة قبل كده
شكرا لمتابعينا قراءة خبر اقتصاد مصر | صندوق النقد يتراجع عن التعويم وبوتين ينقذ الجنيه.. مفاجآت 2024 - مباشر مصر على موقعنا مباشر مصر ونحيطكم علما بان محتوي هذا الخبر تم كتابته بواسطة محرري بانكير ولا يعبر اطلاقا عن وجهة نظر مباشر مصر وانما تم نقله بالكامل كما هو، ويمكنك قراءة الخبر من المصدر الاساسي له من الرابط التالي بانكير مع اطيب التحيات.