نشكركم اعزائنا المتابعين لموقع مباشر مصر ونتمنى قراءة مميزة لهذا الخبر ياترى أيه اللي بيحصل في ملف الديون الخارجية لمصر وازاي الدولة هتتخلص بجزء كبير منها من غير ما تدفع ولا دولار وايه اللي قالته البنوك العالمية على الديون المصرية.. كل ده وتفاصيل تانية مهمة هنقولها لحضراتكم بس خليكم معانا
معروف إن ملف الديون في مصر قديم ومن سنين وكان ومازال بيمثل نقطة ضغط كبيرة على مصر وكفاية نقولك إن الدولة مطلوب منها تسدد 42 مليار دولار في خلال 2024 وده حسب جدول الديون والفوائد بتاعتها في وقت فيه عندنا أزمة نقص في العملة الأمريكية يعني الضغط بيبقى مضاعف على الخزينة العامة يعني لو بتسدد ديون في ظروف عادية مفهاش مشكلة لكن وسط أزمة شديدة دا بيعمق المشكلة.. ومعروف بردو إن مصر عمرها ما تخلفت عن سداد قسط واحد في تاريخها ورغم كده قوى الشر حاولت تستخدم الورقة دي عشان تحرج الحكومة والدولة والقيادة السياسية وتشكك في قدرات الدولة ووصل الأمر أنها قالت مصر على وشك الإفلاس لغاية ما طلعت تقارير دولية من مؤسسات التمويل اللي مصر مستقلة منها ومن الدول وقالت إن قدرة مصر على السداد قوية ومفيش احتمال تتخلف عن السداد ودي كانت شهادة دولية مهمة جدا خرست الإشاعات والإعلام المغرض.
وبشكل عام، تراجعت ديون مصر الخارجية خلال الربعين التاني والتالت من السنة اللي فاتت ووصلت في نهاية سبتمبر إلى 164.5 مليار دولار، مقارنة بذروة سجلتها في نهاية مارس اللي فات عند 165.4 مليار دولار، بحسب بيانات وزارة التخطيط والبنك المركزي ودا خلي بالك في وقت الأزمة بتاعة الدولار والسوق السوداء وتعثر قرض الصندوق وانخفاض تحويلات المصريين بالخارج ودي معجزة قدر المركزي يحققها.
طيب نرجع لموضوعنا ليه بنتكلم عن الديون دلوقتي.. شوف حضرتك فيه توقعات كبيرة أنه يحصل حاجة إسمها إعادة جدولة ديون مصر ودي خطوة مصر بتستغل فيها نفوذها وعلاقتها مع المؤسسات والدول المدينة وتتفاوض معاهم على اكتر من حل يا إما تخفيض الديون نفسها أو اقساطها أو إلغاء جزء كبير منها أو إلغائها كلها وحسب التفاوض مع كل دولة أو جهة وممكن كمان تشمل المفاوضات زيادة مدة القرض يعني بدل 5 سنين يبقي 10 وبكده تقل الأقساط المطلوبة من مصر وحصلت قبل كده وفيه دول لغت ديون كتير على مصر وفيه اللي لغة جزء منها وكمان فيه اللي لغى الفوايد بتاعها ، ومتوقع مع علاقات مصر القوية ودورها في الأزمات الدولية إن دول كتير تتفاعل بإيجابية مع طلب مصر جدولة الديون خاصة إن فيه اتجاه اوروبي وامريكي لمساعدة مصر بعد موقفها من أحداث غزة وفيه مساعدات أوروبية ب10 مليار دولار جاية مصر عشان السبب دا وكمان ملف الجدولة ممكن يشمل مبادلة الديون بسلع أو استثمارات ودا حصل قبل كده بردو.
ومؤسسات دولية كتير اتوقعت نجاح مصر في جدولة ديونها زي بنك مورجان ستانلي والي قال إن مصر ممكن تتجه للجدولة كاإجراء استباقي، خاصة وأن احتياطيات مصر الأجنبية كافية لتغطية خدمات الدين الخارجي ل2024.
كمان توقع معظم المستثمرين في مسح ل “سيتي جروب” إن مصر تقوم بإعادة هيكلة ديونها الخارجية في 2025 وعندها فرص نجاح كبيرة.. طبعا هيكلة الديون هتشيل هم كبير جدا من كاهل الدولة المصرية وخزينة الدولار في مصر وهتساعد بشكل كبير إن البلد تفوق وتترحم من سداد كل المبلغ ده.
شكرا لمتابعينا قراءة خبر اقتصاد مصر | تطور خطير في ملف ديون مصر.. خطة جريئة في الوقت المناسب - مباشر مصر على موقعنا مباشر مصر ونحيطكم علما بان محتوي هذا الخبر تم كتابته بواسطة محرري بانكير ولا يعبر اطلاقا عن وجهة نظر مباشر مصر وانما تم نقله بالكامل كما هو، ويمكنك قراءة الخبر من المصدر الاساسي له من الرابط التالي بانكير مع اطيب التحيات.