نشكركم اعزائنا المتابعين لموقع مباشر مصر ونتمنى قراءة مميزة لهذا الخبر
عمرك سمعت عن صندوق مصر السيادي اللي انضم لقائمة أكبر 50 صندوق سيادي عالمي وترتبيه 47 علي مستوي العالم والـ12 عربيًا، طيب تعرف أية هيا الموارد بتاعته ولا مصادر دخله أية، طيب تعرف راس ماله كام ومين اللي بيشرف عليه وبيستثمر فلوسه فيه أية وأية العائد اللي هيرجع علي مصر من الصندوق ده والصناديق اللي زيه، لو عايز تعرف اجابات الاسئلة دي شوف الفيديو ده للآخر.
في الفترة الأخيرة تردد اسم صندوق مصر السيادي واخرها صفقة اكتتاب الفنادق التاريخية لبيع حصص في 7 فنادق لصالح شركة «أيكون»، المساهم الرئيسي فيها رجل الأعمال هشام طلعت مصطفى مقابل 800 مليون دولار أمريكي.. علشان تعرف اية هو الصندوق هنمشي مع بعض واحدة واحدة علشان نفهم كل حاجة.
أولا صندوق مصر السيادي تأسس بموجب قانون جمهوري من الرئيس عبد الفتاح السيسي رقم 177 لسنة 2018، وهو مملوك بالكامل لجمهورية مصر العربية، وله استقلال مالي وإداري وذمة مالية مستقلة عن الدولة.
قانون انشاء صندوق مصر السيادي حدد مجلس ادارته وبيضم الوزير المختص بشؤون التخطيط، ورئيس غير تنفيذي لمجلس الإدارة، وممثل عن الوزارات المعنية بشؤون التخطيط والمالية والاستثمار، ده غير 5 أعضاء مستقلين من اهل الخبرة في الاقتصاد والقانون وشئون الاستثمار، ومدة العضوية 4 سنوات قابلة للتجديد لمدة واحدة.
قانون الصندوق حدد برضوا مصادر وموارد الصندوق.. وبدأ رأس مال الصندوق المدفوع من 200 مليار جنيه ومخطط لها انها توصل الي تريليون جنيه في 3 سنين، ده غير رأس مال مدفوع 5 مليار جنيه منهم مليار دفعته الحكومة والباقي هيتم سحبه في حالة الحاجة اليه، بالإضافة الي العوائد اللي بيحققها الصندوق من المشاركة في المشروعات الاستثمارية.
وخليني اقولك ان الهدف من الصناديق السيادية هو الاستفادة من الأصول المملوكة للدولة والغير مستغلة عن طريق جذب رءوس الأموال لتمويل المشروعات وفتح الباب للقطاع الخاص المصري والعربي والأجنبي لتمويل المشروعات في مصر وجذب استثمارات الصناديق السيادية الأخرى في المنطقة إلى مصر بعيد عن الروتين والإجراءات الحكومية المملة الطاردة للاستثمار .
طبعا في سؤال حاليا بيدور في دماغك وهو احنا هنستفيد اية من الصندوق ده ... هقولك يا سيدي الاقتصاد المصري هيستفيد من الموضوع ده ازاي.. الهدف الأساسي للصندوق هو تحقيق عوائد مالية لمصر من المشاركة في المشروعات الاستثمارية، والمشاركة مع الصناديق العربية والأجنبية والمؤسسات المالية المختلفة بهدف تحقيق فلوس تدخل الموازنة العامة للدولة .
وأخيرا لو عايز تعرف مين اللي بيتابع الفلوس اللي بتدخل وبتخرج من الصندوق... قانون صندوق مصر السيادي حدد تعيين مراقب حسابات تابع للجهاز المركزي للمحاسبات ومحاسب للبنك المركزي أو هيئة الرقابة المالية لمراقبة ومتابعة كل كبيرة وصغيرة جوا الصندوق، وبيصدورا تقرير عن كل التعاملات عن الصندوق لمجلس الإدارة .
شكرا لمتابعينا قراءة خبر اقتصاد مصر | تريليون جنيه رأس ماله.. ما لا تعرفه صندوق مصر السيادي - مباشر مصر على موقعنا مباشر مصر ونحيطكم علما بان محتوي هذا الخبر تم كتابته بواسطة محرري بانكير ولا يعبر اطلاقا عن وجهة نظر مباشر مصر وانما تم نقله بالكامل كما هو، ويمكنك قراءة الخبر من المصدر الاساسي له من الرابط التالي بانكير مع اطيب التحيات.