نشكركم اعزائنا المتابعين لموقع مباشر مصر ونتمنى قراءة مميزة لهذا الخبر وآخرتها مع الدهب وياترى رايح على فين.. وايه اللي حصل في الساعات الأخيرة واللي اشتري هيعمل ايه واللي لسه بيفكر يشتري هيشتري امتي واللي معاه دهب يعمل فيه ايه.. تعالوا نشوف اللي حصل في الأسواق ومصير المعدن الأصفر
الدهب معروف انه ليه قانونه الخاص وهو عملة وملاذ آمن قائم بذاته وسعره فيه وطول الوقت بيلاعب الدولار.. طيب ايه هو قانون الدهب وسر قوته.. شوف قانون الدهب إنه عشان يزيد سعره لازم يكسر الدولار أو العملة الأمريكية تنزل ولو الدولار بيزيد الدهب سعره بيقل لكن قيمته بتفضل قوية لأنه زي ماقلنا ملاذ آمن وبسبب ندرته عالمياً.. واللي حصل في الساعات الأخيرة لو مش متابع إن الدهب تقريبا كده خرج عن السيطرة وسعره ضرب في العالي بشكل كبير جداً ووصل إلى مستوى قياسي جديد.
طيب ليه الدهب سعره رفع بالشكل ده عالمياً .. عشان اسباب كتير الع من بينها رهانات خفض أسعار الفايدة الأمريكية، والمشتريات للمضاربة ومشتريات البنوك المركزية لأن زي ماقلنا الدهب ماشي عكس الدولار والكلام عن خفض قيمة الفايدة الأمريكية معناه إن سعر الدولار هينزل وبالتالي دي أنسب فرصة الدهب عشان يطلع وده لأن البنوك المركزية بتجري تتحوط من إنهيار الدولار وبتشتري وبتخزن دهب على قد ما تقدر وبالتالي سعر الدهب بيزيد عشان ارتفاع الطلب عليه.
تعالوا نشوف اللي حصل في السوق العالمية الاول قبل ما نشوف اللي هيحصل عندنا.. في معاملات الجمعة سجل الدهب مستوى قياسي غير مسبوق عند 2344.50 دولار في ، وارتفع الدهب 3.8% منذ بداية الأسبوع، ومع توقعات بتحقيق المعدن الأصفر لمكسب للأسبوع الثالث على التوالي وكمان ارتفعت العقود الأمريكية الآجلة للدهب 1.56% إلى 2344.10 دولار للأونصة... الكلام ده معناه ايه طيب.. شوف حضرتك ده معناه ببساطة أن كل التوقعات اللي فاتت عن اتجاه سوق الدهب كانت صحيحة وإن المعدن الأصفر رايح على مستويات تانية قياسية هتوصل 3 آلاف دولار حسب التوقعات وأمكن اكتر من كده وده معناه إن أسعار الدهب في العالم كله هتولع.
لو حصل كده والأونصة وصلت لرقم 3 آلاف دولار تقدر تقول إن سوق الصاغة عندنا هيحصل فيه أزمة اسعار لأن السوق المصري مرتبط بالعالمي ومرتبط بسعر الدولار ولما تحول القيمة بالجنيه يبقي بنتكلم عن أسعار مخيفة للجرام في مصر وفيه احتمال إن جرام 24 يوصل 7 آلاف جنيه حسب توقعات والطريق اللي ماشي فيه الدهب عالميا ولو اتحققت باقي التوقعات كمان .
طيب اللي معاه دهب يعمل فيه ايه دلوقتي.. مش محتاجة تفكير طبعا يخبيه ويشيله للأيام الجاية واللي لسه مشتراش يلحق يشتري بسرعة ويخزنه لأن الدهب هيفضل افضل سوق للاستثمار الآمن.
شكرا لمتابعينا قراءة خبر اقتصاد مصر | وبعدين في الدهب.. السوق رايح على فين ومصير اللي اشترى - مباشر مصر على موقعنا مباشر مصر ونحيطكم علما بان محتوي هذا الخبر تم كتابته بواسطة محرري بانكير ولا يعبر اطلاقا عن وجهة نظر مباشر مصر وانما تم نقله بالكامل كما هو، ويمكنك قراءة الخبر من المصدر الاساسي له من الرابط التالي بانكير مع اطيب التحيات.