اقتصاد مصر | وصل 2 مليون جنيه .. السوق السوداء تحرم الغلابة من حلم الحج - مباشر مصر

الدولار في الوقت الحالي بقي داخل في كل حاجة في حياتنا حتي رحلات تأدية فريضة الحج، هتقولي ازاي اية جاب الدولار عند الحج...، هقولك يا سيدي، اغلب الخدمات الخدمات اللي عايزها الحجاج والمعتمرين المصريين وغير المصريين من سفر بالطائرات وحجز فنادق وانتقالات داخلية في المملكة العربية السعودية ووجبات وخلافه بيكون التعاقد عليها بالريال السعودي واللي سعره رفع مع كل عملية تحرير لسعر الصرف في البنوك، ده غير سعره في السوق السوداء واللي بيكون اعلي من سعره الرسمي في البنوك .

مش بس كده، الريال السعودي اللي شركات السياحة محتاجه علشان تحجز خدمات الحجاج والمعتمرين بقي مش متوفر بشكل كافي وده خلي الشركات تدور عليه في السوق السوداء، وبناء عليه بتم تقدر أسعار برامج حج قرعة السياحة علي سعر الريال في السوق السوداء وده خليأقل سعر لبرامج الحج السياحي يوصل الي 225 الف جنيه للمستوي البري بزيادة 95 الف جنيه عن السنة اللي فاتت، وسعر البرنامج الاقتصادي 260 الف جنيه بدون تذاكر الطيران بزيادة 130 الف جنيه عن السنة اللي فاتت، ووصل سعر برنامج 5 نجوم 450 الف جنيه بخلاف أسعار تذاكر الطيران بزيادة 140 الف جنيه عن السنة اللي فاتت.

مصادر لغرفة شركات السياحة اكدت أن تسعير برامج الحج علي سعر صرف الريال على السعر الرسمي هيعمل خساير كبيرة علي شركات السياحة خاصة في ظل اعتماد الشركات علي تدبير الريال السعودي اللي بتحتاجه لحجز خدمات الحجاج والمعتمرين بنفسها بعيد عن السوق الرسمي، وده بيدفعها للبحث عنه من السوق السوداء وده السبب الأساسي في ارتفاع أسعار برامج الحج. العمرة .

المصادر نفسها اكدت إن الرسوم اللي بتدفعها الشركات للخدمات الحكومية وأبرزها رسوم بوابتي الحج والعمرة واحد من أهم أسباب ارتفاع أسعار البرامج، ده غير الزيادات الطبيعية في أسعار التسكين بالفنادق في السعودية واسعار تذاكر الطيران والانتقالات وخدمات الطوافة المسئولة عن تقديم خدمات الإعاشة للحجاج في مشعري مني وعرفات .

المصادر كلمت كلامها إن الإقبال علي حجز برامج الحج للعام الحالي مش احسن حاجة، وده بسبب نجاح سماسرة موسم الحج في تسفير اكثر من 100 الف مواطن السنة اللي فاتت بتأشيرات الزيارة، وعملوا مناسك الحج زيهم زي الحجاج الرسميين للدولة المصرية وبأسعار أقل بكثير من أسعار الحج الرسمية.

ومن الحج المتوسط وحج محدودي الدخل بنروح للحج الفاخر VIP، واللي وصلت أسعاره السنة اللي فاتت لحد 1.5 مليون جنيه، والشركات اللي شغالة في النوع ده من برامج الحج محدودة جدا وشغالين علي فئات معينة من طوائف المجتمع زي رجال الأعمال والفنانين والمشاهير ويكون السفر فيه بالطائرات الخاصة، ومدة النوع ده من البرامج لا تتعدي  10 ايام، ومتوقع توصل اسعار النوع ده من برامج الحج أكثر من 2 مليون جنيه .

رئيس واحدة من الشركات اللي شغالة في برامج الحج الفاخر، اكد لـ بانكبير إن برامج الحج الفاخر مخصصة لفئة لا تتعدي 2% من الشعب المصري، والبرامج دي لها مواعيد محددة فى السفر والعودة، وتعاقدات خاصة فى الإقامة بالفنادق في مكة المكرمة والمدينة المنورة، ده غير الخيام المكيفة بالمشاعر فى منى وعرفات ولها طبيعة خاصة غير خيام الحجاج العاديين.